Khutbah Jum’at Bahasa Makassar

Description

Tena nakkulle nisali kadaangna ummat Islam malabbirika ri anne kamma, sanrapangi pila’ ammono’ kasungguanna, ka sipa’gang ummatna pila’ nijina’ mami ri cinna pakkalinoang (hubbud dunya). Jaimi ri passimbangenna ummat islam malabbirika anne, sesena ummat buttayya, tenamo nammiwang turu’ ri ero’na agama malambusuka, agama kontutojenga, agama battua ri Karaeng Mappa’jarita. lyaji, na ala siapamo allahere’ akkacinikang kapanrakanga ri tompo’na anne lino napassaba’ki erangpole panggaukanna ummat rupa taua. Annemi saba’ naparallu nikanayya sipakainga’ ri kabajikang sipisangkai ri gau’ sala langngeranga kakodiang (amar ma’ruf nahi munkar).
Parallui massing nikusissing kalea, nikasameng panggaukang le’ba’ laloa, naki ammotere ampiljari agama islam malambusuka, nikangkang jarre’ syahadatta, ki mannojengang tappa mange ri Allah ta’ala. Pinawangi pappijojo’-Na iamiantu Kitabullah Al-Qur’an siagang hadits suro tunipatappa-Na Muhammad shallallahu ‘alaihi wa sallam, naki jappai tallasa’ta i rateanna teteang malambusuka (shirathal mustaqiim). Teaki sala pangngira angkana anne lino katallassang la nipusakai, u’rangi rimangkanayya ka nia’ pale’ akherat la nibattui. lamianjo sallang bori’ kajannanganta, katallassang mannannunganga, tampa’na tunggala’ ata bate pa’jari-Na Allah ta’ala la nisare pa’balasa’ battu ri sikuntu amala’ ampe gau’na ri rewasa tallasa’na anne ri lino. Paralluki makkale tutu anjappai tallasaka ri sikuntu taka’dere’ passare-Na Allah ta’ala, naki tuli istiqamah ri ero’na agamayya. Ta’gala’ jarreki otere’ agama-Na Allah ta’ala, sollanna na tena nitassala ri barakka sirurungang pangngamaseang-Na Karaeng Sarroa Mangngai Mangngamaseang.
Anne bo’boka bonena iamiantu Khutbah Jum’at Bahasa Makassar, bodo-bodo nanrapiki, anjari pappasang, pakkale tutu ri katte ngaseng. Salama’ki ammaca. Sembo dalle’ta, ma’barakka’ tallasa’ta, naki salama empo sunggu ri te’nea, salewangang anjari bonena suruga, lanri jarre’ta angngentengangi agama islam malabbirika.